用NewsHub追踪最热门的话题,分分钟更新,不容错过。 现在马上安装。

英超 3場不敗!阿記賣走黑腳唔同啲

2017年09月17日 星期日 下午2:43
3 0
英超 3場不敗!阿記賣走黑腳唔同啲

英超周日頭場上演倫敦打吡,阿仙奴以眾凌寡之下,作客賽和車路士0比0,唔單止結束近5次聯賽作客車仔輸晒嘅噩夢,自放走「黑腳」阿歷士張伯倫後,聯賽連盃賽近3仗未輸過,更將黑氣過埋畀「張仔」新東家利物浦,之前畀人鬧爆賣走「張仔」嘅主帥雲格又贏1場。

賽前聯賽連歐聯4連勝嘅車仔,雖然好番冇耐嘅王牌夏薩特先任後備,但有弗到爆嘅射手艾華路莫拉達擔正,隊長加利卡希爾亦刑滿復出,相反近5次聯賽造訪史丹福橋球場輸晒嘅阿仙奴,唔單止有中場核心奧斯爾因傷連後備都冇份,主帥雲格竟然用伊禾比,代替日前歐霸贏科隆入靚波嘅王牌阿歷斯山齊士打正選。不過車仔除咗初段柏度洛迪古斯單刀被救出外,之後畀阿仙奴控制戰局,其中完半場前艾朗藍斯殺入禁區篤射中柱,拿卡錫迪即近門執雞炒高最具威脅。

易邊後戰情處於膠着,中段雙方齊齊換入夏薩特及阿歷斯山齊士加強攻力,75分鐘梅斯達菲接應罰球頂入,可惜隊友越位在先搞到食咗鋪詐胡,完場前車仔中堅大衞雷斯鞋底行先踩中哥拉辛拿斯,做埋「紅牌阿姑」被逐,最終雙方打成0比0,阿仙奴亦結束近5次造訪史丹福橋輸晒嘅噩夢。值得一提係,阿仙奴自今夏轉會窗關閉前放走「黑腳」阿歷士張伯倫去利物浦後,連歐霸在內近3仗錄得2勝1和未輸過,反而獲得張仔來投嘅利物浦,近3仗未贏過,包括慘吞曼城5蛋,畀球迷鬧爆賣走「張仔」嘅主帥雲格又贏1場。

来源: hk.on.cc

分享社交网络:

评论 - 0